- عارفه .. في ايام بتعدي علينا كأنها بتعيد ايام فاتت
زي إمبارح مثلاً .. كان اليوم كله شبه اول يوم شوفتك فيه .. كل حاجة فيه متعادة بالمللي .. كان ناقص بس إني اقابلك .. و قابلتك .. كأن اليوم مش عايز يسيب حاجة مايعيدهاش ....
- قلبي دق اول ما دخلت المكان .. الدقه اللي مابحسهاش غير و انا على مشارف مقابلتك
من سنة بالظبط في نفس المكان .. كانت اول مرة اسمع دقة قلبي عاليه كده .. و بعدها كان اول لقا بينا
انهاردة و في نفس المكان ... قلبي دق الدقة اللي انا عارفاها .. عمرها ما كدبت عليا .. اتأكدت اني هشوفك .. وسط الزحام .. وسط الناس الكتير شوفتك .. شوفتك صدفة
زي الصدف الكتير اللي بتجمعنا عشان تعذبنا .
- رغم رفضي لسخافة الوضع و وجعي اننا نتقابل زي الأغراب .. بس ماقدرتش ماسرقش نظرات ليكي
من ورا الزحام و وسط الناس الكتير .. كانت عيني بتشق ليكي طريق
وسط خوف و امل ان عيوننا تتلاقى و الاقيكي بصالي
كان عندي أمل اليوم يخلص بنهاية سعيدة زي توأمه اللي عدى من سنة
بس لزيادة الوجع قرر بس يختلف في النهايات
- رغم تصنعي اني مش بصالك بس قلبي كان حاسس بعينيك حوليا
كنت حاسه بعينك و هي بتسلم عليا ..
رعشةإيدي وسط أمل و خوف من إنك تيجي تسلم عليا
كان نفسي بس عيونا تتلاقى من غير ما تسرق النظرات
عيني دمعت من ظلم الدنيا و اتمنيت الصدفة تفوت
و مشيت و في ودني صوت الست و هي بتقول
"فإذا أنكر خلٌ خله و تلاقينا لقاء الغرباء .. و مضى كلٌ إلى غايته .. لا تقل شئنا فإن الحظ شاء"
