خيالك واسع

خيالك واسع ...

جملة بسمعها من وأنا صغير و إن كانت إتحرفت شوية في مرحلة الشباب و بقت خيالك مريض عشان تضيف حتة فكاهه في الحوار و تأدي نفس المعني

يمكن تكون دي الجمله الوحيده اللي بصدقها عن نفسي و حاببها في نفس الوقت

الخيال دايما كان بالنسبالي بوابه الهروب من الحياة

عيشت فيه اللي ما أقدرتش أعيشه في الواقع

ركبت فيه أحدث موديلات العربيات
 و عملت بيهم خمسات و دريفتات أحسن من بتوع Need for speed

إشتغلت فيه سفير نوايا حسنة
الشغلانه اللي نفسي أشتغلها
مع إني مش فاهم تخصصها بالظبط بس شكلها حاجه خير

غنيت فيه في أكبر حفلات الأوبرا
 و عمر خيرت بنفسه اللي كان بيعزف معايا الأغنيه

حبيت فيه أجمل بنت في الكون
 و إتغازلت في عنيها اللي شوفت الدنيا منها

و رسمت بإيدي رموشها و شفايفها النونو اللي قالتلي بيهم أحلى كلام

مليت صدري من نسايم هوا جايه من بين خصل شعرها

وياما غنينا ورقصنا على كل الأغاني اللي بنحبها

عارف إنه ماينفعش أفضل عايش في الخيال على طول
 و أبعد عن الواقع

بس سامحوني

أصل واقعنا بقى مر بزياده
 و مافيش قدامي غير شوية خيال
 أنعش بيهم اللي مات جوايا
 يمكن يقدر يصحى في يوم و يخلي الخيال واقع

ضيـــف شــرف

وكأني جيت الدنيا دي ضيف شرف

مافتكرش إني كنت في أي نزاع طرف

بدور لنفسي على قصة أكون أنا البطل

أعيش فيها بحرية مش مهم جاه أو ترف

المهم إني أبقى أنا زي ما انا عايز

مش فارق معايا رأي الناس ويمكن و جايز

أنا اللي دايما واخد دور الكومبارس

ويوم مادوري يكبر يبقي صاحب البطل

و ولا يوم إتمردت و حلمت بالعكس

أصل بالنسبالي العكس ده هطل

 بس مالقتش سعادتي ف عيشة حياتكو

ما أنا ماتخلقتش عشان أعيش أدواركو

هتمرد و أعترض حتى لو قالو ده إنحرف

وإسمي ع التيتر هيبقى بطولة مش ضيف شرف

إلـى غــــدي

أشتـاق إليـك يـا غـدي

 شوقـا أحـرق قلبــي إنتـظارا

أشتــاق إلى رائـحة الهواء فيك

فمن دفئه و طهارته

 سأتنفس منه ملئ صدري

تعويضا عن ما أمر به من ضيق تنفس

أشتاق إلى ضحكاتي

 التي سيكون مصدرها قلبي

 و ليست مجرد إبتسامات زائفه

 إحترفت تصنعها فوق شفتاي

أشتقت إلى واقع غير ذا الواقع

واقع أصنعه بيدي

 ناتج عن تمردي

 وإعلاني لعصيان ما أرفضه في نفسي

أشتــاق إلى يــوم أستيقظ فيه و أنا سعيــد لكوني حيــا

أنهض بكــامل نشاطي سعيدا ان في حياتي يوما جديدا 

سأحياه بسعاده
ولست مجرد مؤدي لدور مصطنع في حياة لا اشعر أنها ملكي 

و ما أروعك من غدي

 إن إكتملت بتلك الرائعه

 التي سأكتفي بها من باقي نساء الدنيا

تلك التي إبتسامة منها

 ستكون التعويض العادل عن كل عذاب الدنيا

أترجاك يا غدي بكل ماهو غالي عليك 

أن تأتي مسرعا بمقدار شوقي إليك

 فأنا أنتظر و سأظل منتظرا

على أمل أن تأتي حاملا معك كل أمنياتي و أحلامي

 ففي وسط ظلام حاضري أراك نورا بعيدا

 أتمنى الوصول إليه و لو كان به موتي

أنــا كـذاب

رغم إني متأكد إن محدش يعرف ربنا هيحاسبه إزاي

 بس كتير بفكر في حساب ربنا ليا

 و أكتر حاجه بتخوفني مني هي الكذب

 فرغم إني معنديش مهارة الكذب الإجتماعي

 اللي ساعات بيسموة الذكاء الإجتماعي

 بس برده بخاف ربنا يحاسبني على الكذب اللي بكذبه على نفسي

اه أنا بكذب على نفسي كل يوم

كل يوم إيه 

ده يمكن كل دقيقه

أنا كل يوم بضحك على نفسي و أكذب عليها

 عشان اليوم يعدي من غير ما اتألم

كتير يبقى قلبي بيبكي

 وأنا أعمل مش حاسس وأقضيها ضحك و هزار

و كتير يبقى عقلي هيوقف من كتر التفكير 

و اعمل نفسي رايق و مافيش حاجه شغلاني

أصل انا لو ماعملتش كده هتألم

 و أنا مش عايز أتألم 

عشان زهقت من إني بتألم

و لو بان عليا إني بتألم

 هيسألوني مالك

ومش هعرف أقول مالي

 عشان متعودتش أشكي ولا بعرف أحكي

ولو ماحدش سأل هضايق إن محدش شايفني أو حاسس بيا

فبختصر كل ده علي نفسي

 وأكدب على نفسي

 و أعمل إني مبسوط عشان يعدي اليوم من غير ألم

وأنا عارف إن ربنا رحيم واكيد هيسامحني ع الكدبه دي

بـديـت القصــة .. خلــصت القصـــة

بديــت القصة .. خلصــت القصـة

واللي بينهم مش بس نقطتــين

اللي بينـهم وعـود ماتــت 

وأحــلام طلــعت ســراب

و مشــاعر إتحــكم عليها بالإعدام

ولو دورت أكــتر بينــهم 

هتــلاقي إتـنيــن كان لقاهم بيفرحهم

هتـلاقي مراحـل كتيــر مروا بيــها

خلاص بقــت ذكــرى

هيفتكروها من وقت للتاني و يضحكوا عليها

ولو حــاولت تســمع اللي بيــن الجملتــين

 هتــسمع صوت الأغـاني اللي رقـصت عليـها قلوبــهم ســوا

و كتبــوا كلامها في جــوابات وبعتــوه لبعض جـوا عـلب الشـوكلاته

وهتـسمع صـوت ضحـكهم على جنـانهم اللي عملوه و ماهمش كلام حـد

ولما تـبص بـين الجملتيـــن

 هتــلاقي وشــين كان عليـهم إبتـسامه تحــيي قلــوب

 ونــظرات عيـــن من صدقــها يخـــاف الكــذب

ولـو ســألت الجمــلتيـن عـن أسبــاب للـفراق مش هيقلولك غير

بديــت القصه .. خــلصت القصه‎ ‎

عـايـش

عايش ... رغم الألم و الحزن و الشجن لسه عايش

و بتنفس رغم إن صدري ماليان هموم سنين متكومه فوق بعض لسه بتنفس

و من رحمة ربنا إني لسه بضحك و لسه بعرف أفرح رغم كتر البكا و الدموع لسه في مكان على شفايفي للضحك

و سعات بعرف أحلم و أهرب بخيالي من واقع مر إتفرض عليا

و قلبي ده طلع أقوى مني فبرغم إنه مليان جروح و الأكتئاب خانقه لسه بيقدر يدق و لسه بيعرف يفرح

أما روحي فسعات بتكون أسعد مني لما بتقرب م اللي خلقها ...

مش عايز أكون ممل

أنا بس فكرت نفسي بكل ده عشان أفتكر إني لسه عايش
 

إبــن مــوت

       

وأنا صغير كنت أسمعهم يقولوا على فلان ده إبن موت

ماكنتش عارف يعني إيه فسألتهم يعني إيه إبن موت

قالولي إنه بيكون شخص مثالي في أخلاقه وكل الناس بتحبه

 بس الموت بيخطفه بدري عشان بيبقى خسارة في دنيتنا

فكرت شوية في الموضوع 

و عجبتني الفكرة و إكمني مش حابب الحياة أوي و مش ماسك فيها أصلا

فقررت أبقى إبن موت

بقيت شخص مطيع ، بحاول أرضي كل اللي حوليا 

ولو على حساب راحتي أنا 

 بقيت عايز كل الناس تحبني وأضايق أوي لو فلت مني واحد ماحبنيش

 كل ده ماكنش حبا في الناس لكن كان عشان أبقى فعلا إبن موت

 والموت يخطفني بسرعة 

عشان ابقى خسارة في الدنيا

عدت سنين ع الحال ده و أنا مستني الموت اللي هيخطفني بسرعه و برضه مابيجيش

لاقيته بس بيخطف ناس عزيزه عليا كل شوية 

وإكتشفت إن الموت اه ماخطفنيش إنما سكن جوايا من كتر تفكيري فيه

و حبي إن أكون إبن موت خلاني إنسان مطيع لدرجه تغيظ 

ومنعني من الإستمتاع بالتمرد اللي بيكون مطلوب أحيانا 

خلاني عايش بين الحياة و الموت  الدنيا كلها ماشية وأنا اللي واقف مكاني مابتحركش

فإكتشفت إنه من الغباء إني أعيش ميت و أنا لسه فيا نفس

وإن إنتظاري لحاجه لسه ماجتش هيضيع عليا فرصة إستمتاعي باللي في إيدي دلوقتي

و عرفت إن ربنا خلقنا في الحياة علشان نعيشها مش عشان نموتها

فقررت إني هكمل عمري للأخر

مش مهم فرحان ولا حزين

ماهو ماحدش بيعيشها على سطر واحد

و حتى لو ما كونتش بحب الحياة أوي

 فانا برضه هعيشها  و هدور على هدف أعيش عشـانه‎ 

و الموت بقى يبقى يجي في معاده ... بدري  ..  متأخر

يجي وقت مايجي

 انا مابقتش مستنيه 

و مابقتش من إنهارده
 إبن موت .