مـن طــرف واخـــد ع الأحـزان

إعذرينــي لـو حبــي ليــكي ماليــه الشجن 

أصلي بحبــك مـن طــرف واخــد ع الأحـزان

و بقلـب عـاش عمـره كـله يـدور علـى سكـن

و مالقالــوش غيـر شـوارع البـرد عنــوان 

خايـف أصدق إنــه بيــكي هيـرجع تانــي إنسـان

 خايـف أصـدق إنـك فرحــة و سـكن و أمــان

لمــا بشـوفــك قلبــي بيـفرح و يتـوجع فـي نفـس واحــد

عينــي بتـلمع بحبــك و تـدمع لألمـك كأنــي إتنـين في واحد

كأنـي واحـد إستــحلى المــوت و التـانـي نفسـة يعيــش

فرحــة صغيــرة بتـحارب حــزن مكــون مـن جيــش

فــعذريــني لـو لاقيتـــي حبيبـــك مــجرد بـواقي إنســان

وإعــرفـي إنـــي بحبـــك مـن طـرف واخــد ع الأحـــزان

كــام وصيـــة

بما إن الموت ف بلدنا بقى أسهل من إنك تتنفس

فعندي ليكو كام وصيه .. لما أموت ياريت تتنفذ

  ياريت محدش يتاجر بدمي

        ويعمل إنه شايل هم أهلي وهمي        

محدش يغير صورة بروفايله

   ويحط صورة سوده مكتوب عليها حداد 

قلولوا الأموات مستغنين عن جمايله

أصل عمر الحزن ما كان بكتر السواد

محدش يعيط و يسأل ذنبنا إيه

ماتعملوش عبط إحنا الموت خدنا عليه

وذنبنا إننا حبينا بلدنا بزياده

رغم إنها ماسقتناش غير قهوة ساده

أما نعشي ما يحملوش غير إخواتي

أحمد و مينا .. مارك و إسلام

أصلهم شافو ضحكي وحسوا أهاتي

و حلموا معايا بأجن الأحلام

هيودوا شعري وخواطري لحبيبتي

هيحكولها ع اللي داريته عنها أيام

خدوا بالكو من أمي و بسولي إيديها

قولولها إني ماخفتش م الموت قد ماخفت عليها

قلولها مستنيها ندخل سوا باب الجنه

صبروها بالأمل ده و خلوها تستنى

إعزروني ع الكام وصيه اللي إتقالو لو كانو تقال

إبقوا إفتكروني بيهم مش تدفنوا وتمشوا يا أندال 

عايــز أغنــــي

عايز أغني وتكوني إنتي قدامي

وأشوفك بتضحكي وأنا بغني كلامي

وخدودك تحمر لما إحساسي يوصلك

ده كل كلمه في الأغنيه دي تقصدك

ماهو كل كلمه إتكتبت بحب وإتغنت بإحساس

بغنيلك إنتي بقلبي وبصوتي بغني للناس

ولو عليا ماغنيش بالأتنين غير بس ليكي إنتي

بس بغنايا .. أنا بوصل للناس كلها إنك حبيبتي

عايز أكتب فيكي كلام .. قبل كده ماتغناش

متلحن ع اللحن اللي إتغنى يوم ما أوزوريس عاش

فرقة قلبي تعزف مزيكته .. و فرقه غيرها بلاش

الكمانجه و العود يعزفو و الناي أعزريه ماجاش

الشعور بلاشيء

أتدري شيئا عن ذلك الشعور ؟؟
 الشعور بلا شيئ ...

لست حزينا
 ولكنك لست سعيدا أيضا

لا تريد الصمت
و لكنك لا تجد ماتقوله

تدور في رأسك ألاف الأفكار المعقدة و المشوشة

تحاول جاهدا اللحاق بها
 كي تمسكها وتعرف من أين تبدأ
 ولكن دون أدنى جدوى

تجتاح نفسك رغبة عارمة بالبكاء
 دون أن تدري
 هل ستبكي على نفسك أم من الأيام

هل ستبكي لتريح نفسك أم لتجلدها بدموعك أم لتغسل ذنوبك

هل ستكون تلك الدموع حقيقيه أم دموع تماسيح

يتعبك التفكير

فتقرر أن تضرب بجميع الأفكار عرض الحائط
 و تستجيب للرغبة الوحيدة التي شعرتها

ألا وهي البكاء

لا يهم أسبابه أو نتاجئه

تبدأ بالبحث عن دموعك
 ولكنك تكتشف أن عيناك تخونك و ترفض البكاء

عندها تدرك
 أن كل مابك قد أعلن العصيان عليك
 وكأن كل مالديك لا يشبهك

فتبدأ بالإستسلام
 وإنتظار أن ينتهي ذلك المدعو ...  بلا شيئ

خيالك واسع

خيالك واسع ...

جملة بسمعها من وأنا صغير و إن كانت إتحرفت شوية في مرحلة الشباب و بقت خيالك مريض عشان تضيف حتة فكاهه في الحوار و تأدي نفس المعني

يمكن تكون دي الجمله الوحيده اللي بصدقها عن نفسي و حاببها في نفس الوقت

الخيال دايما كان بالنسبالي بوابه الهروب من الحياة

عيشت فيه اللي ما أقدرتش أعيشه في الواقع

ركبت فيه أحدث موديلات العربيات
 و عملت بيهم خمسات و دريفتات أحسن من بتوع Need for speed

إشتغلت فيه سفير نوايا حسنة
الشغلانه اللي نفسي أشتغلها
مع إني مش فاهم تخصصها بالظبط بس شكلها حاجه خير

غنيت فيه في أكبر حفلات الأوبرا
 و عمر خيرت بنفسه اللي كان بيعزف معايا الأغنيه

حبيت فيه أجمل بنت في الكون
 و إتغازلت في عنيها اللي شوفت الدنيا منها

و رسمت بإيدي رموشها و شفايفها النونو اللي قالتلي بيهم أحلى كلام

مليت صدري من نسايم هوا جايه من بين خصل شعرها

وياما غنينا ورقصنا على كل الأغاني اللي بنحبها

عارف إنه ماينفعش أفضل عايش في الخيال على طول
 و أبعد عن الواقع

بس سامحوني

أصل واقعنا بقى مر بزياده
 و مافيش قدامي غير شوية خيال
 أنعش بيهم اللي مات جوايا
 يمكن يقدر يصحى في يوم و يخلي الخيال واقع

ضيـــف شــرف

وكأني جيت الدنيا دي ضيف شرف

مافتكرش إني كنت في أي نزاع طرف

بدور لنفسي على قصة أكون أنا البطل

أعيش فيها بحرية مش مهم جاه أو ترف

المهم إني أبقى أنا زي ما انا عايز

مش فارق معايا رأي الناس ويمكن و جايز

أنا اللي دايما واخد دور الكومبارس

ويوم مادوري يكبر يبقي صاحب البطل

و ولا يوم إتمردت و حلمت بالعكس

أصل بالنسبالي العكس ده هطل

 بس مالقتش سعادتي ف عيشة حياتكو

ما أنا ماتخلقتش عشان أعيش أدواركو

هتمرد و أعترض حتى لو قالو ده إنحرف

وإسمي ع التيتر هيبقى بطولة مش ضيف شرف

إلـى غــــدي

أشتـاق إليـك يـا غـدي

 شوقـا أحـرق قلبــي إنتـظارا

أشتــاق إلى رائـحة الهواء فيك

فمن دفئه و طهارته

 سأتنفس منه ملئ صدري

تعويضا عن ما أمر به من ضيق تنفس

أشتاق إلى ضحكاتي

 التي سيكون مصدرها قلبي

 و ليست مجرد إبتسامات زائفه

 إحترفت تصنعها فوق شفتاي

أشتقت إلى واقع غير ذا الواقع

واقع أصنعه بيدي

 ناتج عن تمردي

 وإعلاني لعصيان ما أرفضه في نفسي

أشتــاق إلى يــوم أستيقظ فيه و أنا سعيــد لكوني حيــا

أنهض بكــامل نشاطي سعيدا ان في حياتي يوما جديدا 

سأحياه بسعاده
ولست مجرد مؤدي لدور مصطنع في حياة لا اشعر أنها ملكي 

و ما أروعك من غدي

 إن إكتملت بتلك الرائعه

 التي سأكتفي بها من باقي نساء الدنيا

تلك التي إبتسامة منها

 ستكون التعويض العادل عن كل عذاب الدنيا

أترجاك يا غدي بكل ماهو غالي عليك 

أن تأتي مسرعا بمقدار شوقي إليك

 فأنا أنتظر و سأظل منتظرا

على أمل أن تأتي حاملا معك كل أمنياتي و أحلامي

 ففي وسط ظلام حاضري أراك نورا بعيدا

 أتمنى الوصول إليه و لو كان به موتي